Vieiros

Nas calores do verán, os programadores Sergey Karakovsky e Julian Togelus armaron un desafío ben curioso en colaboración coa cita para as tecnoloxías do videoxogo da Games Innovation Conference.

Deica o próximo 3 de setembro permanece aberto o prazo para as inscricións. A proposta é discorrer un sistema baseado na intelixencia artificial que permita que as personaxes sexan quen de actuar a través do xogo sen intervención humana. Como base para o desafío vaise utilizar o Infinite Mario Bros, unha versión homenaxe do videoxogo que combina as bases do orixinal para xerar aleatoriamente un número ilimitado de novos niveis de xogo.

Realizáronse dúas convocatorias simultáneas que coinciden coas dúas citas competitivas. A primeira finaliza o 18 de agosto, e vaise resolver na Conferencia sobre Innovación e Videoxogos de Londres, a celebrar entre o 25 e 28 de agosto. A segunda remata o 3 de setembro e a competición será no marco do Simposio sobre Intelixencia Computacional e Videoxogos, a celebrarse entre o 7 e 9 de setembro.