Vieiros

As remeiras galegas demostraron esta fin de semana que vogando non hai quen lles gañe. A súa embarcación impúxose con superioridade na Ikurriña de Getxo, sexta regata puntuábel para a I Liga Euskotren (ACT) disputada en augas biscaíñas. A falta de dúas probas aseguráronse matematicamente o triunfo absoluto na primeira competición feminina de traíñas.

Formada por remeiras de Sanmertolaméu, Cabo de Cruz e Chapela, a embarcación galega non tivo rivais. Gañadoras en cinco das seis probas disputadas até o de agora, marcaron un tempo de 11:05:17, avantaxando en 9:09 a Biscaia; en 12:08 a Guipúscoa e en 1:11:02 a Cataluña. Co taboleiro clasificador como segue:Galiza suma xa 23 puntos; Biscaia 15; Guipúscoa 14 e Cataluña 5; as galegas teñen xa asegurado o título da liga, malia que a competición non rematará até os días 15 e 16.

Así, as deportistas do "Galicia Rianxeira" demostraron o seu bo estado de forma nesta primeira edición da competición. Saíron ao mar no seu debut no Grove o pasado 11 de xullo e, dende aquel segundo posto, ascenderon rapidamente á elite do remo feminino. Gañaron en Pontevedra e, dende entón, todas as súas participacións foron vitorias: en Pedreña, Arkote, Zumaia e agora Getxo. As 23 remeiras demostraron así que Galiza é invencíbel na categoría feminina das regatas de traíñas.