Vieiros

"Ademais de carecer dun proxecto de país, Alberto Núñez Feijoo defraudou aos galegos". Este é o balance que fixo o voceiro nacional do BNG, Guillerme Vázquez sobre os 100 primeiros días do Goberno presididio polo Partido Popular. Acusou ao presidente de "non estar á altura de Galiza, e de liderar un cambio "francamente decepcionante". "Non vimos ningunha medida contra a crise nin en defensa de sectores económicos moi danados, como o lácteo", dixo ao tempo que criticou que, pola contra, recorra "a vellas receitas pouco novidosas, como eliminar a gratuidade universal dos libros de texto".

Vázquez tamén lamentou outras accións do novo Goberno, como "a súa abstención na votación dun modelo que o BNG ve prexudicial para Galiza", en referencia ao financiamento, ou asinar "un pacto fraude" sobre o AVE co Ministerio de Fomento. "O único que fixo foi venderse aos intereses de Madrid", subliñou.

Finalmente, entre os principais retos que considera que lle esperan ao presidente, o líder do BNG aludiu á crise e á articulación dun Estatuto "de primeira", se ben subliñou que "o seu principal reto debera ser actuar como presidente dunha nación como é Galiza".