Vieiros

Séntate e cavila o que significa para ti a túa lingua, para despois erguerte e procurar debuxalo no visor da túa cámara. Aos que non consigan canalizar esa inmensa difusión que nos abrangue cando pensamos no noso idioma, sempre lles queda coller a cámara fotográfica ou a videocámara e saír á rúa (ou corredoira) e pedirlle ao país que nos explique o que para el significa a o galego.

Animádevos e participade na cuarta edición de Unha imaxe para o galego, certame no que os participantes teñen que expresar mediante fotografías e vídeos o significado que ten para eles a súa lingua. O prazo de entrega de traballos quedou aberto o pasado martes día 12, e non se pechará até o 30 de xuño. Partillade cos lectores de Vieiros a vosa concepción dese patrimonio común en continua construción que constitúe o noso idioma.

Lembrade que o xurado valorará especialmente a orixinalidade, e desaconsella tópicos recorrentes como retratos de persoeiros, bandeiras, libros, letras ou imaxes de xornais impresos. Despois, a liberdade creativa é máxima e só se dan unhas premisas básicas que no concurso fotográfico consisten en prohibir deseños e ilustracións. No concurso de vídeos cínguese a duración máxima aos catro minutos, recomendando un formato cunha duración de entre un e dous minutos.

Podes consultar aquí as bases e os traballos que xa están chegando