Vieiros

O ciclista chileno do Supermercados Froiz Carlos Oyarzun impúxose na segunda etapa da Volta ciclista a Galiza. A etapa entre A Coruña e Porto do Son deparou un fermoso espectáculo de ciclismo puro, con continuos ataques e escapadas.

A tirada remataba no Alto de Eixas e até o pé da ascensión chegou en cabeza un grupo formado polo ruso Arkimedes Argüeyes, Mikel Landa, Rafael Rodríguez e o propio Carlos Oyarzun. No comezo da subida Oyarzun cambiou de ritmo bruscamente e deixou atrás aos seus compañeiros de viaxe. Por detrás o primeiro clasificado da xeral, Enrique Salgueiro, tamén arrancou procurando a defensa do liderado e rematou superando aos outros tres escapados e chegando na segunda posición, a só sete segundos de Oyarzun.

Despois desta xornada a xeral queda encabezada por Enrique Salgueiro (Extremadura - Spiuk), con 20 segundos de vantaxe sobre Carlos Oyarzun (Supermercados Froiz) e un minuto sobre Gustavo Rodríguez (Cidade de Lugo). Mención especial merece o campión do mundo de triatlón, Xavier Gómez Noya, que está competindo co equipo Renault Caeiro e ocupa actualmente o 12º lugar na táboa a só un minuto e 38 segundos do líder.

• Páxina da Volta, coas diferentes clasificacións