Vieiros

Na súa intervención diante dos medios, Carlos Aymerich chamou a atención sobre os que, na opinión do seu grupo parlamentario, foron "dous elementos positivos" no acto deste mércores no Parlamento. En primeiro lugar referiuse Aymerich ao feito de que todos os grupos estean representados na Mesa do Parlamento. Felicitou así a vontade de diálogo e o acordo acadado polo BNG co PsdeG-PSOE, "en aras da pluralidade". "É un bo inicio que todos os grupos parlamentares esteamos representados continuando unha tradición que permitiu isto nas últimas lexislaturas", comentou.

En segundo lugar, Aymerich cualificou de "bo precedente" que a presidenta do Parlamento se referise a Galiza "como unha nación". O deputado coruñés amosou a "esperanza" de que o acontecido fose "máis que unha anécdota". Por outro lado, o voceiro do Bloque explicou que a súa formación ten a intención de realizar un labor de oposición "construtivo, rigoroso e moi firme, en defensa dos intereses do país e sobre todo en defensa dos intereses de aqueles galegos e galegas que con máis dureza están soportando as consecuencias da crise".