Vieiros

Negativas previsións as achegadas este luns pola Fundación das Caixas de Aforros (Funcas), que no seu último informe advirte de que o Estado Español pechará o ano en curso cun 17,2% de persoas sen emprego, porcentaxe que se incrementaría en 2010 até o 19,8%. Á beira, destacan o prognóstico dunha caída de até o 3% do Produto Interior Bruto en 2009.

Con todo, a análise de Funcas sinala que andado o ano próximo afrouxaría o actual escenario de crise de xeito que a caída en 2010 podería quedar en só un 0,5%. Segundo o mesmo estudo, a partir de abril de 2010 os balances trimestrais comezarían a amosar cifras positivas, malia que, avisan desde Funcas, na consolidación desa tendencia debera ter un papel fundamental o funcionamento do sector financeiro, que debera restabelecer "a normalidade" na inxección de cartos no escenario económico.

Fronte á ralentización actual, a fundación recomenda diversas iniciativas, entre outras unha reforma fiscal que sirva para "loitar contra o déficit" e que incluiría incremento do IVE, a redución do Imposto sobre Sociedades e o aumento do tipo de medio do IRPF. Tamén suxiren recortarlle ás cotas á Seguridade Social das empresas ao tempo que piden aumentar as dos traballadores. Así e todo, Funcas prevé que o déficit público se dispare até case o 10% en 2010.