Vieiros

A breve comparecencia do candidato nacionalista á Xunta de Galiza non contentou aos xornalistas que, insistentemente, lle piden unha quenda de preguntas á súa responsábel de prensa. Sen facerse de rogar, Quintana accede e, de xeito improvisado, ao carón do atril que estaba disposto para a ocasión e ante os micros de decenas de medios, resposta ás cuestións dos xornalistas máis avezados. Cal é a autocrítica que se pode facer? Espétalle unha correspondente dun medio madrileño. “Temos que meditalo con calma”, di Quintana nun plural que non abandona, “non pode pretender que faga agora unha análise profunda, haberá que estudalo con calma”. Vai dimitir? Pregunta outro espelido reporteiro. “Estou á disposición do BNG”, responde o candidato, mentres os flashes e os focos das cámaras se dirixen cara el. “Gustaríanos que os resultados fosen outros, estabamos moi ilusionados”, di, “pero a xente decidiu, e hai que aceptalo. Igualmente tivemos milleiros de votos, o que nos obriga a seguir adiante”. As análises, os debates, e as decisións... quedan para mañá.