Vieiros

As instalacións de Balaidos acollen os días 20, 21 e 22 o campionato estatal sub-23 de squash, no que haberá unha considerábel participación galega encabezada pola actual campioa do torneo feminino, Xisela Aranda. Ademais de Aranda, no cadro feminino destaca a presenza da pontevedresa Ana Arosa, a oitava favorita á vitoria. No torneo masculino a gran baza galega é o compostelán Carlos Cornes, terceiro favorito; mentres que o pontevedrés Sergio Fernández aparece de noveno na lista de candidatos ao torneo facilitada pola organización do mesmo.

Xisela Aranda explicounos que chega ben porque leva "meses preparando os campionatos absolutos estatais e europeo". A viguesa cumpre no 2009 23 anos, polo que será a súa última participación nun torneo do que xa gañou as dúas últimas edicións. Cando lle pedimos que valore as súas posibilidades, Aranda foi concluínte e afirmou que "é un torneo que teño que gañar".