Vieiros

Michel Salgado foi presentado este luns como novo presidente do Vigo Stick. No acto acompañárono parte da antiga directiva, o cadro de xogadores do primeiro equipo e algunha das novidades que trae con el a este novo proxecto. Segundo explicou o xogador do Real Madrid, a súa intención é dar unha seguridade económica e deportiva ao equipo, que pasou serias dificultades económicas nos últimos meses.

Salgado estará acompañado polo antigo presidente, Enrique Urdiales, que pasa agora ao cargo de vicepresidente coa intención de converterse na súa man dereita dentro da entidade viguesa. Ademais o veterano futbolista chega ao Vigo Stick acompañado de poderosos empresarios como Alberto Ruano, representante no estado de Toshiba; ou Javier Hidalgo, alto cargo de Air Europa. Salgado explicou que o primeiro obxectivo da nova directiva é asegurar o club economicamente, sen renunciar a pensar no ascenso á máxima división estatal no futuro.