Vieiros

Un frouxo Athletic de Bilbao non foi rival merecente para o Deportivo da Coruña en Riazor esta fin de semana. Os herculinos sacaron músculo futboleiro para zoupar con insistencia no contorno da porta vasca, e conseguiron furar a rede en até tres ocasións. Ao final: 3-1.

O mesmo número de goles colleitou o Celta de Vigo, aínda que neste caso na súa visita ao campo de Levante. O triunfo colleitado por aquelas terras (1-3), sitúa os vigueses en situación impensábel hai poucas semanas cando se movían moi perto do pozo do descenso. A sensación de que o combate polo ascenso a Primeira é posíbel comeza a aparecer nas esperanzas seareiras.

Doutra banda, no duelo de filiais en terras do Valladolid, os mozos do Deportivo B foron quen de gañar por 0-2. Mentres, o Pontevedra perdía na casa da Cultural Leonesa (2-0) e o Ciudad de Santiago deixaba escapar tres puntos de Compostela fronte á Ponferradina (1-2). Puntos que amarrou na Malata o Rácing de Ferrol diante do Guijuelo (2-1). Por outro lado, o Lugo – Celta B resolveuse en favor dos locais (3-1).