Vieiros

Boa actuación dos galegos que competiron a pasada fin de semana na Copa de Europa por equipos, participando dentro do combinado estatal. O torneo realizouse na localidade turca de Konya, durante os días 1 e 2 de novembro. O equipo estatal obtivo a medalla de prata na categoría masculina e o bronce na feminina.

Na modalidade masculina, ademais de Xosé Fernández, loitaron Vicente Muriel, Nicolás García e Mikel Bernal. O combinado estatal non tivo problemas para impoñerse nas primeiras roldas a equipos como Polonia, Bielorrusia ou Xeorxia. En semifinais conseguiron superar ao potente combinado francés, acadando o pase a unha final na que agardaban os anfitrións. Na rolda definitiva o equipo turco aproveitouse do intenso ambiente creado pola súa afección e gañou a medalla de ouro.

Na categoría feminina Estefanía Hernández e Belén Asensio non puideron chegar ao combate polo ouro. O equipo completábano a madrileña Sandra Lorenzo e a Catalá Elena Gómez. De novo foi Turquía o equipo que se cruzou no camiño do equipo estatal, en semifinais, e relegounas a unha meritoria medalla de bronce.