Vieiros

A directora xeral para o Deporte, Marta Souto, e o xerente da Fundación Deporte Galego, Xabier Rico, estarán esta cuarta feira en Brest (Bretaña) para asistir á xuntanza do Comité Internacional dos Xogos Náuticos Intercélticos e do Espazo Atlántico.

Alí han presentar a candidatura de Galiza como país organizador e sede dos Xogos para 2010. os últimos xogos desenvolvéronse este verán nas vilas de Getxo e Sopelana, en Euskadi, e Galiza desprazou a máis de 70 mozos e mozas para participar.

Os Xogos Náuticos do Espazo Atlántico
Até o ano 2007 este evento denominábase Xogos Náuticos Intercélticos, e nel participaban as rexións e países celtas (o País de Gales, Galiza, Cornualles, Escocia, Asturias, o Norte de Portugal e Irlanda). En 1997 desenvolvéronse por primeira vez en Galiza, na cidade de Ferrol, e no 2004 no Salnés. Porén, dende o ano pasado Euskadi pasou a facer parte do conxunto de delegacións participantes, polo que os xogos acrecentaron o seu nome con tres verbas máis: "do Espazo Atlántico".

Os Xogos son, principalmente, un gran encontro dos deportes náuticos -vela, surf, kaiak, remo...- e tamén das culturas celtas, e téñense convertido nun evento ineludíbel nos veráns da Europa Occidental. Cada ano, entre 600 e 800 competidores, acompañados de varios grupos de músicos e de bailaríns da súa terra, xúntanse nun ambiente cordial, amigábel e deportivo. Os Xogos están recoñecidos polas Federacións Internacionais dos deportes náuticos.