Vieiros

Abel Lago ampliou, na última proba disputada en Brasil, a súa diferencia con respecto aos seus perseguidores, polo que se atopa en disposición de acadar o subcampionato mundial no último campionato que se disputará entre os días 1 e 9 do mes de novembro en Marrocos.

Lago tamén chegará ao país africano con serias posibilidades de vencer a modalidade de "ondas", na que vén de perder a primeira posición, ao ser superado despois de Brasil polo dominicano Jan Marcos Rivieras.

O primeiro lugar da clasificación xeral é para o estadounidense Jesse Richards, que con só 16 anos está abraiando a todos os seus rivais, xa que lidera a clasificación xeral absoluta, así como dúas das tres modalidades que a compoñen, e tamén a xeral júnior.

Espectáculo garantido
O kiteboarding é unha das modalidades máis espectaculares do surf. Nela o surfeiro vai enganchado a unha enorme cometa que lle permite facer espectaculares movementos suspendido no aire, polo que estas probas adoitan ofrecernos imaxes de grande impacto visual.