Vieiros

"O feito de que existe auga en Marte resolve un dos desafíos que tiñamos", explicou para a BBC Mario Acuña, astrofísico da NASA que leva tempo participando en misións relacionadas con Marte, "agora hai que determinar se existiron bacterias ou elementos biolóxicos, o que será un salto moi grande".

"Primeiro, non temos osíxeno, non hai unha atmósfera que conduza a vida tal e como a coñecemos", di Acuña, "ademais está o problema da radiación ultravioleta en Marte, que destrúe a vida na superficie". Willian Boynton, responsábel de operacións coa sonda, subliñou que malia as probas previas sobre a existencia de auga nese planeta "é a primeira vez que a auga marciana foi tocada e analizada".

Phoenix tomou terra no ártico marciano o 25 de maio, nun área inexplorada da superficie do planeta. A pa mecánica da sonda recolleu mostras diversas do solo de Marte para analizalas a través dos instrumentos que leva incorporados. Os científicos non atoparon aínda material orgánico nas mostras, e agardan poder revelar novas e gorentosas informacións durante as próximas semanas. Alén dos posíbeis descubrimentos sobre a existencia ou non de vida nalgún momento, os científicos agardan saber se hai zonas habitábeis no planeta, onde existise auga de cando e vez.