Vieiros

Un dos administradores da rede interna do concello de San Francisco, EUA, Terry Childs, tivo durante dúas semanas sen servizo os empregados municipais. Aparentemente sen explicación, o 12 de xullo bloqueou a infraestrutura.

Malia que foi arrestado o 13 de xullo, Childs non quixo facilitar as claves da rede, que cambiou para que ninguén máis puidese acceder a ela. Non serviron as advertencias, nin o feito de estar na cadea baixo unha fianza de 5 millóns de dólares, nin a ameaza da fiscalía de sete anos de cadea.

O administrador só aceptou desbloquear a rede cando os representantes municipais cederon á súa petición de concertar unha cita co alcalde, Gavin Newsom, sen coñecemento da fiscalía. Segundo Childs, o alcalde fora a única persoa que moderou as críticas cara a el cando o bloqueo se fixo público.

O informático, que deixou sen rede o concello nun ataque de xenreira, asegurou que os seus superiores desprezaban sistematicamente as normas de seguridade, mentres que eles afirman que o avisaran, baixo ameaza de despido, pola súa insubordinación.