Vieiros

Nun congreso no que o PSOE teimou en profundar nas políticas sociais, o galego Xosé Blanco foi elixido novo vicesecretario xeral do partido. O até hoxe secretario de Organización do PSOE ascende dentro da formación, ocupando un cargo que deixou vacante Alfonso Guerra en 1997. A donostiarra Leire Pajín ocupará, á súa vez, o lugar que deixa o político galego, exercendo como "número 3" do partido.

Ademais, a última hora da tarde tamén se soubo de dous galegos máis que han pasar a facer parte da Executiva Federal do partido: o alcalde de Santiago de Compostela, Xosé A. Sánchez Bugallo e a voceira do PSOE no Senado, a viguesa Carme Silva.

Na liña das políticas sociais
Como se escoitou toda esta semana, o PSOE continuou, no seu congreso, na liña de traballo relacionada coas políticas sociais. De feito, un dos puntos máis destacados da xuntanza socialista foi o que falaba dunha "reforma vangardista" da Lei do Aborto, que ha recoller, segundo dixo a vicepresidente primeira do goberno español, María Teresa Fernández de la Vega, "as experiencias máis innovadoras das leis de indicacións e prazos que xa contemplan outras lexislacións europeas".

Aínda que nun comezo a dirección do PSOE non tiña incluído a interrupción do embarazo na relatorio marco, as emendas presentadas polos militantes obrigaron a modificar as previsións, porque é "precisa a revisión e actualización da lexislación sobre o aborto, tras 23 anos da súa entrada en vigor", detalla o texto. De todos os xeitos, pese á apertura, os socialistas descartaron pedir, polo momento, unha lei de prazos, pois podería entrar en discusión coa doutrina do Tribunal Constitucional.