Vieiros

Seis votos, os dos concelleiros socialistas, foron abondo para aprobar os orzamentos de Foz. Malia que o PsdeG goberna en minoría neste concello mariñao, a ausencia dunha concelleira do PP permitiu que o trámite saíse adiante sen maiores dificultades. A edil en cuestión é Luísa Prieto, quen decidiu non acudir á última sesión plenaria sen dar máis explicacións aos seus compañeiros de partido que dicir que non o tiña nada claro. O concello de Foz está gobernado polos socialistas, con seis concelleiros dos trece que conforman o goberno local. Catro edís pertencen ao BNG e os outros tres ao PP.

Pacto antitransfuguismo
O BNG vén de pedir que se convoque o pacto antitransfuguismo para analizar o sucedido. Acusa ao alcalde, Xosé María García Rivera, de querer alterar os resultados electorais e de non saber gobernar sen maioría absoluta. Sospeitan que a concelleira popular actuou de xeito premeditado, polo que demandan que todos os partidos se sumen a condena desta práctica. Asemade, demandan ao presidente da Xunta, Emilio Pérez Touriño, e ao PsdeG que se manifesten en contra dos socialistas focegos.

Mentres, o PP de Foz xa convocou unha xuntanza para analizar o comportamento de Luísa Prieto e estudarán a súa expulsión. Asemade, a agrupación local comunicou o acontecido á dirección provincial do partido e agardan que se tomen decisións sobre o sucedido.

Pola súa banda, Xosé María García Rivera restou importancia á ausencia da concelleira popular e enmarcou a súa postura nos problemas internos que puidera ter o PP local.