Vieiros

O secretario xeral de Comunicación da Xunta, Fernando Salgado, informou este luns de que a media de gasto anual en publicidade institucional do Goberno nos últimos tres exercicios foi de catro millóns de euros por anualidade.

No entanto, en resposta a unha pregunta do deputado do PPdeG Diego Calvo na Comisión Institucional do Parlamento, Salgado salientou que esta cifra representa un desembolso un 22% inferior ao realizado polo Executivo en 2004, cando os populares estaba na Xunta.

Segundo as cifras da base de datos sobre publicidade Infoadex, en 2005 gastouse un total de 3,9 millóns de euros; en 2006, 3,5 millóns; e en 2007, 4,6 millóns. É dicir, en total 12 millóns de euros dende o cambio de Goberno.

Por debaixo da media estatal
Fernando Salgado apuntou ademais que mentres en 2004 o gasto da Xunta (máis de cinco millóns) estaba un 83% por riba da media das comunidades autónomas españolas (2,8 millóns), na actual lexislatura o gasto galego estivo sempre por baixo desta media.

Diego Calvo lamentou a falta de datos sobre os tres primeiros meses deste ano. "Son tan elevados que non lle interesa dicilos?", preguntouse o deputado popular, que vinculou ese suposto incremento coa celebración de eleccións xerais. Ademais, queixouse de que as cifras achegadas non estivesen analizadas por consellarías.

• O Consello da Xunta estudará incluír os xornais gratuítos nas subvencións aos medios