Vieiros

Segundo a enquisa Lingua e identidade en Cataluña 2008 (Llengua i identitat a Catalunya 2008), cuxos resultados fixo públicos a pasada semana a UOC, a maior parte dos cidadáns cataláns votarían a favor dun referendo no que se decidise a independencia do país. Ademais, o informe revela que as cifras de falantes de catalán tamén medraron: en dez anos son 838 mil persoas máis.

A enquisa aplicouse a unha mostra de 1.108 persoas, co fin de coñecer os usos lingüísticos da poboación catalá, o coñecemento da lingua, aspectos de identificación territorial e o posicionamento nalgunhas cuestións políticas. Como se emprega a mesma metodoloxía que na primeira enquisa, feita en 1998, pódese seguir a evolución sociolingüística destes dez anos.

Con respecto á identidade nacional, pouco máis dun 30 por cento dos enquisados declara que se sente tan catalán como español; algo máis do 22 por cento séntese só catalán; e o 19 por cento séntese máis catalán que español.

O 36,5 por cento dos enquisados declarou que votaría a favor da independencia se houbese un referendo; un 22,1 por cento votaría en contra, e un 27,1 por cento absteríase.

A maior parte dos enquisados tamén está a favor de que sexa Cataluña quen organice os seus propios transportes (57,6%); que o catalán sexa a lingua oficial e de traballo na UE (54,8%); que a administración catalá sexa a que recade e decida a distribución dos impostos (49%); e que as seleccións deportivas catalás poidan xogar partidos internacionais oficiais (39,3%).