Vieiros

A Cámara vasca aprobou este venres unha moción que critica o goberno español por "amparar sistematicamente e sen excepción" ás Forzas de Seguridade do Estado cando hai denuncias contra elas por torturas e malos tratos. O documento, presentado por Aralar, foi apoiado polas forzas que compoñen o tripartito e polos representantes de EHAK.

Pola súa parte, PSE e PP mostráronse en contra dunha moción que cualificaron de "obscena". Aintzane Ezenarro, deputada de Aralar que defendeu a proposta, sinalou que a pesar de que están en contra da violencia de ETA non poden ocultar "outras actitudes denunciábeis que son incompatíbeis cun Estado garantista". Ezenarro sinalou que, precisamente, o feito de acabar coas torturas aínda aílla máis a ETA. Na moción, lembran que hai precedentes de informes elaborados por Amnistía Internacional e polo Relator de Nacións Unidas para a Tortura onde se destacan casos de maltrato policial.