Vieiros

"Os temas enerxéticos son e van ser condicionantes para a vida de moitas persoas, por cuestións como a crise alimentaria, a suba do prezo do petróleo ou a cuestión dos combustíbeis en xeral", salientou o sindicalista galego Fermín Paz, membro do Buró e do Consello de Administración da Asociación Dereito á Enerxía.

Trátase dunha asociación internacional fundada hai oitos anos en Francia e que goza na actualidade de "estatuto consultivo especial" no Consello Económico e Social da ONU. Inclúe representantes de case medio milleiro de colectivos procedentes de 70 países diferentes.

Temas como a a crise dos países empobrecidos polo aumento dos prezos dos cereais, estreitamente relacionada cos movementos do sector enerxético, serán tratados na reunión que a asociación terá na capital galega a próxima semana. Na xuntanza vaise presentar ademais unha iniciativa relacionada coa análise do contorno enerxético europeo e outra sobre os países mediterráneos, europeos e africanos. Haberá tamén dúas mesas de traballo, baixo os títulos "A enerxía e os retos de presente e futuro", e "A enerxía e a sustentabilidade e os aspectos sociais". Participarán entre outros Michel Leclerc, presidente da asociación; Xan Álvarez, director do Instituto Enerxético de Galicia; representantes dos principais sindicatos e tamén de empresas do sector.