Vieiros

Alfredo Suárez Canal mostrouse "optimista" ante a posibilidade de acadar o acordo para a sinatura dun contrato homologado entre os produtores e a industria leiteira. Na Mesa do Leite que se celebra este martes existen, segundo indica o conselleiro de Medio Rural, "mellores condicións e unha maior receptividade", que coa tentativa de hai un ano e salientou a "boa receptividade" que se percibe por ambas as dúas partes implicadas na negociación.

Dende a consellaría valoran o interese de produtores e de industrias de levar a bo termo este acordo e que entenderan como "paso positivo" o contrato homologado para coñecer "como vai evolucionar en cada campaña o prezo do leite".

O modelo de contrato presentado o sábado era, segundo Medio Rural, coñecida por todas as partes, xa que foi presentado en xullo do pasado ano, e as sucesivas modificacións foron realizadas tras as reunións mantidas entre sindicatos, cooperativas e industrias leiteiras cada sete ou 15 días.

O contrato
Este modelo de contrato homologado busca obter unha estabilidade do prezo para cada unha das campañas lácteas. De xeito mensual ou trimestral, procederíase a unha revisión na que quedasen reflectidas a evolución do mercado e a oscilación dos custes de produción. Conséguese así unha maior estabilidade, que beneficiará a todos os axentes do sector, a pesar das flutuacións estacionais que poidan xurdir.

UU.AA. apoiará o contrato homologado se os prezos son "obxectivábeis"