Vieiros

Non é a primeira vez que o selo discográfico Ouvirmos publica un traballo deste tipo. Hai tres anos publicou a fotobiografía sonora de Manuel María, que tiña a mesma estrutura que a que o vindeiro mércores 16 presentará en Pontevedra sobre Celso Emilio. Trátase dun libro no que destaca unha amplia selección de fotografías sobre o poeta, ao redor de 120, ademais dunha breve interrupción a cargo de Ramón Nicolás.

Ademais, o máis novidoso destas iniciativas son os cedés de audio que acompañan o libro; nun deles inclúense as gravacións que o propio Celso Emilio Ferreiro realizou lendo os seus poemas, no outro recompílanse quince cancións realizadas por outros tantos grupos e artistas, como Fuxan Os Ventos, Los Tamara, María Manuela, Suso Vaamonde e diversos integrantes de Voces Ceibes. Ademais, inclúese unha versión realizada por Dios ke te Crew, Deitado frente o mar, gravada expresamente para este disco. O disco ábrese cunha introdución realizada por Xurxo Souto, que explica o contexto no que foron compostas as cancións a raíz dos poemas de Celso Emilio Ferreiro.

O libro e os dous cedés, orientados tanto cara ao seu consumo particular como cara aos colexios e institutos, terá un prezo de 39 euros.