Vieiros

Esta cuarta feira preséntase no Parlamento Europeo un prototipo de avión propulsado exclusivamente por enerxía solar. O vehículo, un ultralixeiro de 1.500 quilos de peso, aspira a dar a volta ao mundo sen usar nin unha pinga de combustíbel.

A aeronave presentarase durante a conferencia 'Cara a unha aviación máis duradeira' e forma parte do proxecto Solar Impulse. Os máximos responsábeis da iniciativa, Bertrand Piccard e André Borschberg, falarán dela perante os eurodeputados europeos e os representantes do Executivo comunitario, entre eles o comisario de Transporte, Jacques Barrot. No acto tamén se proxectará un documental sobre a construción do avión e exhibirase unha maqueta.

A Comisión Europea é patrocinadora da aeronave HB-SIA, que se está a construír preto da cidade suíza de Zúric e que funcionará tanto de día como de noite coa enerxía do sol. O proxecto ten como obxectivo dar a volta ao mundo sen emitir gases contaminantes. Aínda que Bruxelas non financia a iniciativa directamente, si a apoia pola importancia de ser un proxecto limpo.