Vieiros

Máis de 36.000 persoas visitaron o Salón de Turismo, Deportes e Desenvolvemento Rual -Turisport 99- para coñecer as diferentes ofertas de lecer alí mostradas. Esta cifra supón un incrmento do 17 por cento respecto do número de persoas que visitaron o certame o pasado ano.

Turisport celebrouse dende o pasado mércores no recinto da Feira Internacional de Galicia en Silleda, xunto co Salón do Equipamento Hosteleiro e, dende o pasado venres, con Equina 99 e Canina 99.

O principal obxectivo desta feira é contribuír a mellorar a comercialización da oferta presente no salón e das casas de turismo rural e hoteis de Galicia. É por iso que organizou unha bolsa de contratación na que se rexistraron máis de 500 encontros de negocio con 21 touroperadores europeos.

Na xornada de onte, o presidente da Fundación Semana Verde, Xosé Maril, recibiu unha placa dos alcaldes da comarca do Barbanza como recoñecemento ao seu traballo en favor do tecido productivo galego.

En canto aos salóns "Equina" e "Canina", houbo exhibicións de doma clásica e vaqueira, ademais do Concurso Nacional de Beleza, ao que asistiron cans procedentes de todo o Estado.