Vieiros

"O BNG quere que Galicia sexa recoñecida como nación dentro do Estado español, recoñecido este como Estado plurinacional", afirmou Quintana nunha entrevista publicada este domingo en Faro de Vigo. O voceiro nacional do BNG engadiu que o proceso de autogoberno é "un proceso dinámico, que consiste en que aos poucos o país vaia tendo maiores capacidades competenciais". Deste xeito Anxo Quintana descartou unha consulta popular sobre a autodeterminación de Galicia, semellante á anunciada polo lehendakari Juan José Ibarretxe para 2008, porque o BNG "non é unha forza independentista, senón nacionalista".

O vicepresidente da Xunta reafirmou o obxectivo de conseguir as competencias de Salvamento e Seguridade Marítima debido a que "parece máis lóxico organizar o salvamento marítimo desde aquí e non a mil quilómetros de distancia". "Estaremos mellor preparados para afrontar unha catástrofe", puntualizou. Así mesmo, incidiu en que un dos obxectivos do Bloque é "frear o proceso de recentralización no ámbito territorial, de involución democrática e de regresión social que está propondo o Partido Popular", xa que "as ideas que está preconizando o señor Rajoy son tremendamente prexudiciais para Galicia".