Vieiros

O I Circuíto de ciclismo escolar chegará, nestes meses, a máis de 20 mil escolares de entre 6 e 15 anos.

Encadrado dentro do programa Ciclismo no meu concello, que se puxo en marcha na Coruña o pasado 9 de novembro coa inauguración da exposición 120 anos de ciclismo galego, este circuíto comezará a sexta feira que vén ás 14:00 horas nas instalacións do CEIP Maceda. Durante as dúas horas de duración da actividade as nenas e os nenos poderán realizar distintos exercicios ciclistas baixo a supervisión de dous corredores do Karpin Galicia e de técnicos da Federación Galega e do Club Ciclista Maceda.

O mesmo día tamén chega a Maceda a exposición itinerante 120 anos de ciclismo galego, que permanecerá na vila até o 29 de novembro.

O Circuíto de Ciclismo Escolar
Este circuíto nace coa idea de chegar a todos os concellos e a todos os colexios para achegarlles aos nenos e nenas circuítos escolares permanentes, que lles axuden a desenvolver as calidades técnicas sobre a bici, (a velocidade e a potencia), sen maiores riscos que calquera outra actividade deportiva escolar.