Vieiros

"Cos cartos de todos debera vostede ser prudente, e apostar pola eficacia e a transparencia", reprochoulle Carlos Aymerich a Manuel Fraga, ao tempo que censuraba que o ex presidente rexeitase responder ao amplo número de preguntas que sobre a xestión da Cidade da Cultura lle fixeran tanto el coma o voceiro socialista.

"Compárase vostede cun rei do absolutismo?", comentou ademais o deputado nacionalista despois de que Fraga empregase boa parte da súa intervención anterior para referirse ao "rei Fernando VI". "Vostede foi un presidente elixido democraticamente, pero a democracia non se expresa só na forma de chegar ao poder, hai que facelo coa xestión".

O voceiro do Bloque tamén criticou que Fraga malia ser "o pai do proxecto" apostase agora por "renegar da súa crianza", en referencia ao desvío de responsabilidade que o ex presidente lle atribuíu fundamentalmente aos conselleiros de Economía e Cultura durante o seu goberno. Preguntoulle ademais polo tirapuxa que existiu daquela no interior do executivo, con Pérez Varela gañando "o pulso" fronte ao control que quería estabelecer Facenda. "Algún papel tería vostede aí?", preguntoulle.