Vieiros

As conferencias comezan esta segunda feira en Compostela, a partir do mediodía na Facultade de Filoloxía da USC. Nelas intervirán os profesores Evanildo Bechara, da Academia Brasileira de Letras, e Malaca Casteleiro, da Academia das Ciências de Lisboa, presentados polos catedráticos galegos Martinho Montero Santalha, José Luís Rodrigues e Maria do Carmo Henriques.

O profesor Bechara -autor de dúas ducias de libros, entre os que está a Moderna gramática da Língua Portuguesa, empregada nas escolas e medios académicos, e director da equipe de estudantes de Letras da PUC-RJ-, vai falar sobre "A Língua Portuguesa na visão dos fundadores da ABL: unidade e diversidade".

A conferencia de Casteleiro leva por título "Contribuição do Dicionário da Academia das Ciências de Lisboa e do Dicionário Houaiss para a unidade, na diversidade, da Língua Portuguesa". O Profesor Malaca Casteleiro é responsábel de varios proxectos de investigación, entre os que destacan o de Português Fundamental; Estruturas Lexo-Gramaticais do Português Contemporâneo e o Dicionário electrónico do Português Contemporâneo. Tamén é de salientar o Dicionário da Língua Portuguesa Contemporânea, -coñecido como o "Dicionário da Academia" e publicado en 2000-, e o Dicionário Escolar da Língua Portuguesa.

Pola creación da Academia Galega da Língua Portuguesa
Segundo os organizadores, o evento responde ao desexo da Comissão Promotora da Academia Galega da Língua Portuguesa, creada na sede da Associação de Amizade Galiza-Portugal, de ofrecer ao público galego un testemuño directo de dous representantes da lingua portuguesa, nunha altura "na que o portugués de Galiza está nunha encrucillada, estando en xogo as aplicacións do Acordo Ortográfico".

Durante as conferencias, os profesores galegos participantes e mailos organizadores presentarán o seu proxecto de creación dunha Academia da Língua Portuguesa no noso país, que xa amosaron esta fin de semana no VI Congresso da Lusofonia, celebrado en Bragança. O tema deste encontro, que terminou no sábado, foi a variante brasileira da lingua portuguesa, e na sesión de peche o profesor Malaca Casteleiro defendeu que "também o galego é uma variante do português e como tal deve se trazido para o espaço da lusofonia".