Vieiros

Segundo os responsábeis do CGTD de Pontevedra, os e as deportistas que alí se aloxan acadaron na tempada 2006/07 uns "magníficos resultados", tanto a nivel académico coma deportivo.

O CGTD é unha entidade onde os novos deportistas de elite galegos poden traballar na súa formación integral, e practicar o seu deporte ao máis alto nivel. No centro póñense á disposición dos e das deportistas os medios precisos para que poidan desenvolver a súa preparación conforme a criterios científicos, e facilítaselles ao mesmo tempo a súa integración no sistema educativo e no seu contorno social. O CGTD creouse tamén para apoiar de xeito especial os novos talentos deportivos que no seu contorno socio-económico teñan máis dificultade para desenvolver unha práctica deportiva de calidade e compatíbel coa súa formación académica.

Para acadar os obxectivos anteriores, o CGTD desenvolve nas súas instalacións e coa colaboración das federacións deportivas galegas, os programas de tecnificación deportiva dirixidos fundamentalmente á formación de deportistas con idades comprendidas entre 14 e 18 anos.

Desta forma, os resultados deportivos, aínda que pendentes de competicións estatais e internacionais, foron valorados polo 70% dos responsábeis dos programas de tecnificación deportiva como moi satisfactorios e cualitativamente superiores aos obtidos en cursos anteriores.

Resultados acadados polos/as deportistas do CGTD
42 deportistas campións/as de Galiza.
25 deportistas subcampións/as de Galiza.
13 deportistas acadaron o terceiro posto nos campionatos de Galiza.
34 deportistas campións/as do Estado.
23 deportistas subcampións/as de Estado.
22 deportistas acadaron o terceiro posto nos campionatos Estatais.
12 deportistas participaron coa selección galega en competicións internacionais.
11deportistas participaron coa selección española en competicións internacionais.
27 deportistas están recoñecidos como Deportistas Galegos de Alto Nivel.
7 deportistas están recoñecidos como Deportistas de Alto Nivel no Estado.

Depois da deportiva, a formación académica
Segundo datos facilitado por Deporte, o 87,25 % dos deportistas do CGTD matriculados na ESO e Bacharelato promocionan ao curso seguinte. O 98% deles que cursaron 4º de ESO acadan o título de grao en ESO. O 79 % que cursaron 2º de Bacharelato acadan o título de bacharelato na modalidade Científica, da Saúde ou das Ciencias Sociais. O 70 % deles co título de bacharelato accederán á universidade, preferentemente ás carreiras que ofertan universidades galegas.