Vieiros

As reflexións expostas este luns xorden deste Libro Branco da Acción Exterior de Galicia, coordinado por Fernando González Laxe, ex presidente da Xunta. Ao fío, o presidente do Goberno, Emilio Pérez Touriño, explicou que Galiza "ten e debe aspirar a ter en maior medida unha voz activa nos ámbitos culturais, económicos internacionais e mundiais".

A estratexia presentada destaca a posibilidade de que Galiza asine tratados ou instrumentos internacionais en nome do Estado español, aínda que deberán contar coa súa previa autorización, e que segundo expoñen os autores "deberán referirse a materias de competencia autonómica exclusiva".

Touriño lembrou as ferramentas xa existentes para a acción exterior galega, caso da Fundación Galicia Europa, da que destacou a súa reformulación, de xeito que agora "involucra" as consellarías do Goberno da Xunta que teñen protagonismo e papel específico nos asuntos europeos.

As primeiras "embaixadas" galegas
Á volta do verán, a capital arxentina, Bos Aires, será sede da primeira delegación da Xunta no exterior, segundo se explicou, e en breve a capital uruguaia, Montevideo, podería acoller a segunda. Pérez Touriño indicou que o despregue destas oficinas de representación ten que ver coa "presenza da galeguidade no exterior" e cos propios intereses "económicos, culturais e comerciais" de Galiza. "Trátase de estabelecer institucionalizadamente e ao servizo do país e de todas as institucións do país, unha presenza permanente, estábel, regrada e transparente", dixo o presidente, "que garanta o principio de unidade de acción".

Eixos estratéxicos
Apoiar os axentes galegos no exterior para estabelecer "canles de relación" cos axentes internacionais relevantes é un dos pés da estratexia exterior galega, segundo detallou o coordinador do estudo. Fernando González Laxe destacou tamén a necesidade de cooperación coas áreas estratéxicas "máis dinámicas" nun mundo "onde se abren fronteiras e se dá a internacionalización nos campos económicos, comerciais, sociais e culturais, educativos".

Outro principio, insta a "colaborar co desenvolvemento global" favorecendo a creación de máis riqueza e a redución da pobreza, promovendo políticas de igualdade, protexendo e mellorando o medio ambiente, os ecosistemas e a biodiversidade. Un cuarto eixo sería a voz activa de Galiza na procura de valores colectivos en favor do desenvolvemento sustentábel, da erradicación de calquera tipo de discriminación e da aposta pola axuda humanitaria.