Vieiros

Este premio, promovido polo Instituto compostelán Rosalía de Castro, foi resolto este mércores 27, logo de seren dadas a coñecer o 6 de marzo as novelas finalistas. O xurado integrábano rapaces de ESO e de Bacharelato do IES Luís Seoane de Pontevedra; do IES Foz, de Foz (Lugo); do IES Xermán Ancochea Quevedo, de Pobra de Trives (Ourense); do IES Cacheiras de Teo (A Coruña) e do propio IES Rosalía de Castro.

Tíñao difícil, fronte a contrincantes como Spam, de Francisco Castro e editada por Galaxia, ou o premio Xerais do ano pasado, Tres segundos de memoria, de Diego Ameixeiras. Finalmente, foi a novela precisamente finalista aos Premios Xerais no 2005, O club da calceta, de María Reimóndez, a gañadora deste XIII Arcebispo San Clemente.

En lingua castelá, a vencedora foi El abrecartas, de Vicente Molina Foix, editada por Anagrama, que competía con Mauricio o las elecciones primarias, de Eduardo Mendoza (Seix Barral) e Abril rojo, de Santiago Roncagliolo (Alfaguara). Na categoría de lingua estranxeira (en edicións traducidas), a escolleita foi Kafka en la orilla, de Haruki Murakami (publicada en TusQuets), por riba das outras dúas finalistas, El mar, de John Banville en Anagrama; e Perdido el paraíso, de Cees Nooteboom e editado por Siruela.

O premio está dotado con 3.000 €, e será entregado a finais deste ano ou comezos do que vén. Xa o gañaron autores galegos como Isidro Novo, Suso de Toro, Manuel Rivas, Marilar Aleixandre, Rosa Aneiros ou Teresa Moure, ou, dende o Ámbito hispánico, Javier Cercas, Vargas Llosa, Carmen Martín Gaite ou Almudena Grandes. e da esfera internacional como Abraham Yeshoúa, Antonio Tabucchi, José Saramago, Paul Auster ou Melania G. Mazzucco, entre outros.