Vieiros

No VIII Encontro de Embarcacións Tradicionais de Galiza, a celebrar en Ferrol entre o 5 e o 8 de xullo, hai aínda cousas ben peculiares, alén dos barcos que van participar.

Cousas de utilidade
Vai haber unha gardería, posta en marcha pola comisión organizadora, para nenos de 3 a 5 anos e de 6 a 12 , de mañá e de tarde todos os días. Tamén, na taberna mariñeira, vai haber un menú mariñeiro, como ten que ser, no que, ao mellor non falla a caldeirada, comida tradicional galega e mariñeira, segundo destacan dende Cultura Marítima, que se preparaba nas propias embarcacións, en alta mar, cos peixes e mariscos que se ían recollendo de camiño.

Estrañas embarcacións
Entre os barcos que van participar no encontro de Ferrol está un buque baleiro d'As Azores, que traerá o Clube Náutico das Lajes do Pico; unha xente dende Escocia, con gaitas e todo, tamén traerá o seu barco; e virá xente dende Irlanda, da Bretaña... e dende varios lugares da península.

O submariño que non dá chegado
Mais este ano parece que tampouco vai vir o submariño do que xa se falara nos encontros de Cambados, hai dous anos. Ao parecer o submariño que fora escollido para aparecer polas augas galegas era un artefacto portugués, o Ilha Loba, de máis de corenta anos, que vai máis para o fondo que para a superficie, e cuxa gasolina custa aínda un ollo da cara, polo que ao mellor os asistentes aos encontros van ter que agardar un ano máis por el.

E senón, como propoñen nos foros dos encontros, pódese traer aquel narco-submariño que foi apreixado hai uns meses en Vigo, que se fixo en Gondomar e que está morrendo nun estaleiro moañés. Este tería ben que ver cunha parte da "cultura" do mar de Galiza.

Unha cámara web instalada en Coruxeiras e un encontro de blogueiros
O Clube do Mar de Ferrol xa ten instalada unha cámara web, aberta 24 horas, na que podes ver todo o que acontece no peirao ferrolán no que se van celebrar os encontros.

E ademais está programado un encontro de blogueiros que traballan pola difusión da cultura mariñeira na rede, aproveitando as novas tecnoloxías para difundir o seu traballo na recuperación das embarcacións tradicionais, na carpintería de ribeira, na navegación a vela. Xente que loita na rede pola defensa, socialización e posta en valor do patrimonio material e inmaterial da Cultura Mariñeira e Fluvial de toda Galiza.