Vieiros

Un recente estudo do xigante petroleiro BP aseguraba que as reservas "demostradas" de bolsas de petróleo en todo o planeta permitirían cubrir a demanda durante un período de corenta anos e facelo ao ritmo de consumo que a sociedade mantén na actualidade.

Fronte a esas previsións, os científicos integrados no chamado Oil Depletion Analysis Centre, avisan de que as cifras arredor do petróleo son ben menos optimistas. Na opinión deste colectivo de investigadores, a cota máxima de produción vaise conseguir de xeito inminente, calculan que en catro anos, momento no que a produción petroleira comezará a caer con forza. Ao fío, agoiran un forte impacto para a economía mundial. Colin Campbell, quen fora vicepresidente de importantes compañías do sector como a propia BP, Shel ou Chevron Texaco, argumentaba esta semana en The Independent que as reservas de petróleo máis baratas para a súa extracción xa hai dous anos que se esgotaron.