Vieiros

Representantes do Partido Socialista de Euskadi (PSE) e de Batasuna acordaron nunha reunión secreta organizada o 29 de maio do pasado ano pechar un acordo político resolutivo sobre o conflito no País Vasco antes do 31 de xullo dese ano. Este, daría paso á formación dunha mesa de partidos en outubro, segundo informa o diario Gara.

Nesa reunión, os representantes da formación de Arnaldo Otegi presentaron aos socialistas "unha proposta escrita" de "acordo para a recuperación da confianza" que, entre outros aspectos, contemplaba a sinatura "dun pre-acordo" antes do 31 de xullo, así como o compromiso de pór en marcha antes de outubro a mesa de partidos e de elaborar un calendario do proceso.

Este acordo debería ser negociado non só polo PSE e Batasuna senón tamén polos socialistas navarros (PSN), algo ao que accederon os primeiros, explica Gara.

Primeira xuntanza pública
O "froito máis visíbel" dese "pacto secreto" sería a xuntanza mantida, por primeira vez ante a presenza das cámaras, nun hotel de Donostia o 6 de xullo por Patxi López, líder do PSE, o portavoz do PSOE, Rodolfo Ares, e os dirixentes de Batasuna Arnaldo Otegi, Rufi Etxeberria e Olatz Dañobeitia.

O PSOE defendeu nesa reunión como punto "imprescindíbel" que Batasuna dese os pasos necesario para o seu legalización "canto antes, no verán mesmo". Gara afirma que, nese momento, ambas partes levaban xa seis anos cruzando diagnósticos e propostas.

Por último, o diario vasco recolle o compromiso adquirido polo PSE no que se comprometía a tratar de que o secretario xeral do PSN, Carlos Chivite, fixese unha declaración pública valorando positivamente a actitude do PSE, e citando a necesidade de dar pasos neste terreo.