Vieiros

"Hai quen neste país está máis preocupado polo negocio que polo futuro, pero nós, os socialistas, non", subliñou o secretario xeral do PSdeG na súa intervención, desafiando o PPdeG a responder "a que intereses defenden cando dan batalla contra a protección do medio ambiente".

Touriño pediu votar "polo futuro do territorio" e destacou que o cambio de goberno na Xunta "conseguiu a fin da ruína do noso territorio", salientando o impulso da Lei de Medidas Urxentes de Protección do Litoral, iniciativa que definiu de "medida en favor do país e do futuro".

Por outra parte, acusou o PPdeG de usar os municipios onde goberna para enfrontarse co goberno e afirmou que Galiza precisa "alcaldes que cooperen", indicando que "é a única garantía para solventar os problemas dos cidadáns". "A cooperación é desenvolvemento e futuro, a confrontación é retroceso e pasado", dixo, denunciando ao fío que o PP "quería alcaldes para a submisión cando gobernaba na Xunta, e agora que está na oposición, recruta alcaldes para a confrontación". "Nunca creron na autonomía municipal", reprochoulles Touriño.