Vieiros

Xunto con Galicreques, organizado pola Asociación Cultural Barriga Verde dende a Sala Yago compostelá para comezar o curso con entusiasmo, en torno a comezos de outubro, O Festival Internacional de Títeres de Redondela é o outro grande evento para os monicreques de todo o planeta. Bonequiños de madeira, tea, fíos, para pór na man como unha luva, siluetas para facer sombras chinesas e mesmo títeres tan pequechos como un dedal ou feitos co propio corpo do titiriteiro, chegan dende a India, Kenia, Arxentina ou Hungría.

Dende Galiza, preséntase por primeira vez o grupo de animación de rúa vigués Zancalino Produs, un exército de zancudos capitaneados por Avelino González na súa motocicleta xigante, e as charangas NBA, formada por un grupo de amigos de Betanzos, Oleiros, e Cambre que levan vinte anos animando as festas de toda Galiza, "Os Jaláticos" de Marín, e a Turre's Band.

Entrando xa de cheo nas compañías de títeres, este ano é especialmente heteroxénea a participación no festival: os asturianos Kamante Teatro confrontan actores e obxectos en ¡Que viene el lobo!. A catalá La Baldufa cóntanos a historia de Monsieur Bocamoll, Marcello o mecánico inventor, e Ursus, o piloto acrobático, no espectáculo de rúa Zeppelin. Tamén dende Lleida veñen Fadunito, co espectáculo itinerante de rúa "La Gran Familia".

Marionetas de toda Europa...

A italiana Laura Kibel trae unha modalidade de técnica que xa coñeciamos da man de Hugo e Inés na anterior edición do festival: os títeres "corporais": Và dove ti porta il piede, ou Vai onde te leven os pés, é o consello destas marionetas que xorden do propio corpo da actriz. A francesa Petits Miracles, compañía nada da man de Dominique Kerignard, trae Les Puces savantes, un divertido espectáculo de doma de títeres-pulga no circo, cos seus malabaristas, acróbatas, cuspidoras de lume, equilibristas... K.O. MIC, creada en Rennes por Geraldine Menuet e William Voisin, propón dous espectáculos de rúa: Jean-Martin du Vérin e Jean-Sébastian du Roulement qui Craque.

O ruso Viktor Antonov é unha das figuras máis destacadas na arte de creación e manipulación de bonecos no seu país: Circus on strings é un circo de marionetas de fío para toda a familia. E tamén dende o Leste veñen os húngaros Mikropódium, fundada por András Lénárt, Stop está feito coa técnica chamada precisamente "Lénárt": o espectáculo, mudo, realízase nun escenario moi pequerrechiño con títeres do tamaño dun dedal, o que esixe a proximidade do público moi reducido (non hai problema, xa que a peciña será repetida cantas veces sexan necesarias).

... e do planeta enteiro

Despois, atoparemos agrupacións da outra beira do Atlántico, como a arxentina Asomados y Escondidos, unha habitual xa da outra gran cita anual dos títeres, Galicreques. Huevito de ida y vuelta é unha simpática historia sobre o ciclo vital feita con títeres de mesa. Tamén da Arxentina veñen Valeria Guglietti, coas súas sombras chinesas, e o fermoso espectáculo Bar Tango, da Compañía Buenos Aires Títeres, realizada con Bunraku e manipulación directa. Os mexicanos Teatro Tinglado mergúllannos no thriller cómico Informe negro, feito con títeres de luva, e a compañía peruana La Santa Rodilla, con Hugo Suárez, trae de novo Manologías, unha curiosa arte corporal en que as marionetas son partes do propio corpo do actor.

E mesmo do afastado Oriente chegan titeres dispostos a arrasar: Hong Kong Puppet and Shadow Art Center (HKPSAC), creada polo mestre Wong Fai, trae un espectáculo que mestura marionetas de fíos e títeres de mesa. Dende a India, Akar Puppet Theatre empregan monecos de fíos tradicionais do Rahastán e tamén outras técnicas máis contemporáneas: Amar Singh Rathod reúne marionetas de fíos e outros estilos. E dende Kenia volven outros habituais dos festivais galegos, Krystal Puppeteers.

Dende que naceu hai dez anos, a compañía é unha auténtica comunidade de base, que emprega a arte dos monicreques como apoio e instrumento para campañas de educación e saúde no seu país: sobre a SIDA, a malaria, a planificación familiar... Empregan música en vivo e diversas técnicas: o moniño Libendi, protagonista de Tears by the river, ten que abandonar a súa terra nunha época de seca e fame. En resumo, temos unha semana para gozarmos de todas as técnicas, todas as temáticas e todas as culturas nesta oitava edición do Festival Internacional de Títeres de Redondela.