Vieiros

Aproximadamente uns 5.000 traballadores manifestáronse este venres polas rúas de Vigo, en protesta polo incumprimento do convenio laboral do metal. A marcha transcorreu sen incidentes durante toda a mañá.

Ás 12.00 horas, os operarios mantiveron unha asemblea informativa na Praza do Rei, fronte ao concello, coa participación de todos os sindicatos con representación: CIG, UXT, CCOO e CUT, este último motivo de discordia entre empresarios e centrais.

Mentres os primeiros sinalan que non é representativo, que non asinou o convenio e que tampouco pertence á Comisión de Seguimento da Axencia da Bolsa de Emprego (ABE), os sindicatos defenden que forma parte da comisión de folga e ten que estar sentado na mesa de negociación.

Folga na ITV
Ademais, os traballadores en folga dos centros da Inspección Técnica de Vehículos, ITV, decidiron convocar unha concentración diante da delegación da Xunta en Pontevedra, segundo informa a CIG, quen tamén denunciou a agresión a un dos seus afiliados no Porriño por parte dun delegado da UXT.