Vieiros

Compostela convértese esta semana na capital mundial da maxia coa Semana Internacional de Ilusionismo, que se desenvolve do 15 ao 21 de abril por diversos lugares da cidade. O público pode admirar na rúa, no Teatro Principal no Auditorio de Galicia, en centros socioculturais e en colexios os espectáculos máis abraiantes.

Un dos máis de trinta magos que participan, e membro da Asociación Profesional, é o Mago Romarís, que define o seu espectáculo como de “estilo enxebre” e con moito humor.

Vieiros: Como naceu a idea de crear esta semana de maxia?

Mago Romarís: A idea da Semana Internacional do Ilusionismo xa xurdiu hai uns quince anos. Un grupo de magos, sobre todo o Mago Antón, vimos que estaban a aparecer máis artistas que se querían dedicar profesionalmente a isto. Houbo reunións entre nós e decidimos facer un festival galego. En Lugo, hai catro anos, montouse un primeiro festival que tivo un grande éxito. Logo decidimos trasladalo a Compostela, para darlle máis repercusión, ao ser a capital. Entón, hai dous anos presentóuselle o proxecto ao concelleiro de Cultura, Néstor Rego, e agora, finalmente, fíxose. Non creo que se vaia arrepentir. Está a ser un enorme éxito. Por exemplo, o domingo pola tarde máis de 6.000 persoas viron a actuación de Luís de Matos.

V: E que distingue o espectáculo do Mago Romarís?

M. R.: Romarís é un mago galego, cun estilo propio que combina maxia e humor. Introduzo na actuación elementos do país, como viño, filloas, chourizos... É un estilo... enxebre.

V: Cal é o seu principal público?

M. R.: O noso público é toda a xente, toda a familia. Atraemos todos os públicos. Nun momento podes subir un rapaz ao escenario, logo xente máis maior... A nosa misión é repartir felicidade. Cada un dos magos ten o seu estilo particular: algúns conectan máis cos rapaces, como por exemplo Cyrille Sinclair ou Chrystyan Magic. Pero o público é todo o mundo, aínda dentro dos diferentes estilos: o meu é cómico, o do mago Antón é de grandes ilusións, o mago-mimo Anyo coida moito a posta en escena, tamén temos un mago galego-alemán... son 19 estilos diferentes.

V: A asociación Magos Profesionais de Galicia, que organiza esta semana, é un fenómeno único.

M. R.: É o primeiro a nivel do Estado, de Europa e penso que do mundo. O feito de que os magos profesionais se xunten a nivel profesional é único. Non é o habitual nos tempos que corren, nos que predomina a competencia. Loitamos xuntos pola maxia galega. Non pasa noutros lugares, onde hai grandes estrelas independentes. Todo foi grazas ao mago Antón. Ademais, hai un bo ambiente: temos o apoio da Xunta, do director xeral de Creación e Difusión Cultural, Luís Bará. Temos un recoñecemento no Igaem a nivel institucional, e mesmo axudas para as infraestruturas.

Os magos galegos participaron en diversos festivais por todo o país, como este en Marín, o pasado mes de Maio: