Vieiros

Os cinco oficiais estaban acusados da desaparición, nos dous primeiros anos da ditadura, dos italianos Angela María Aietta Gullo, Giovanni Pecoraro e a súa filla Susana, de 30 anos e embarazada no momento da desaparición. Foran detidos e torturados na Escola Mecánica da Armada. O Tribunal Penal de primeira instancia de Roma condenounos, en ausencia, a un ano de illamento, e previu un resarcimento de danos de 100.000 euros para cada unha das partes civís. Ao coñecer a sentenza, Juan Carlos Dante Gullo, fillo de Angela María Aietta Gullo, sinalou que o fallo "reafirma o compromiso de Nunca Más contra o terrorismo de Estado". A súa nai participara na creación de Nais de Praza de Maio. "Estivo na ESMA nunha sala de torturas que se chamaba 'Capucha'. Alí identificárona porque era a única á que chamaban polo seu nome, María, e non por un número". En tanto, as Nais de Praza de Maio expresaron nun comunicado a súa "profunda satisfacción" pola condena emitida polo tribunal romano.

O fiscal Franceso Caporale pedira o pasado febreiro a condena a cadea perpetua para catro deles, pero non para Vañek, para quen pediu a absolución por falta de probas, que foi finalmente desestimada polo xuíz. No caso tamén está procesado o ex almirante Emilio Massera, aínda que un psiquiatra enviado a Bos Aires pola Xustiza italiana confirmou o pasado día 6, a súa "débil saúde mental", polo cal non será xulgado.

O avogado que representa á provincia de Cosenza (de onde era orixinaria Angela María), Ernesto Magorno, dixo que se trata de "unha sentenza histórica, que fai xustiza a italianos e arxentinos que durante eses anos loitaron e morreron pola democracia". O chamado 'Proceso de Reorganización Nacional' que comezou co golpe de Estado o 24 de marzo de 1976 deu comezo a sete anos de torturas, represión ideolóxica, desaparicións e secuestros. Ao mandato dos militares Videla, Massera e Agosti seguiulles, dende o 81, o de Roberto Viola (80-81), Leopoldo Galtieri (81-82) e Cristino Nicolaides (82-83).