Vieiros

Que mellor xeito de celebrar a chegada da primavera? Peregrinas é unha nova entrega do ciclo que o grupo de teatro vén facendo ao longo do curso 2006-2007. Que viaxe agarda a quen se atreva a acudir á cita? A cita desta vez é diante da Pedrera, ás 20 horas. Que teñen que ver as Compostelanas con Gaudí?

Sempre se dixo que a peregrinación é un dobre camiño: o físico, esixente, suorento, e o interior, duro e introspectivo. Neste caso, a actuación do grupo Furafollas é unha metáfora deste dobre vieiro.

Ás 20 horas, diante da Pedrera, troleiros e público iniciarán o transcendente itinerario que leva da Casa Milà até a Galería Sargadelos. Trátase de coñecer o esforzo físico que require toda experiencia iniciática. Ao son de gaitas e cantares de cego, espérase vivir a emoción das andareiras mentres atravesan xeografías e paisaxes diversos, a ilusión de chegares a Galicia, a entrega ao divisar Compostela, o premio da Compostelana.

Unha vez na Galería Sargadelos chegan os intres da reflexión. A viaxe íntima farase sentindo os bailes de María Balteira, a valentía de María Soliña. E todo nos tempos de María Castaña. O interior cálido e acolledor da Galería Sargadelos é a hospedaría onde as que camiñan cara ao solpor pasan a última noite antes de entrar na Catedral de Santiago. O nerviosismo, as ganas de chegar e a superación dos atrancos. Alí as peregrinas da vida encherán os miolos da xentada con exemplos de soldadeiras, artesás, monxas, compoñedoras.

A actuación comeza esta vez ás 20 horas diante da Pedrera. A segunda parte, recollida e devota, comezará polas voltas das 20.30 horas. Recoméndase a asistencia a tal fenomenal evento e traer a vestimenta apropiada para peregrinar (absterse manequíns de Coronel Tapioca).

ACTUACIÓN DE FORAFOLLAS
Peregrinas
Horario e lugar:
Ás 20 horas do mércores 21 de marzo, diante da Pedrera.
Logo, na Galería Sargadelos ás 20.30 horas.
---
Casa Milà - La Pedrera
Provença, 261 / Passeig de Gràcia
---
Galería Sargadelos Barcelona
Provença 274, 08008
Tel.: 93 215 03 68
---
Furafollas e Sargadelos Barcelona son membros de Rede.cat.