Vieiros

O propio presidente da Xunta, Emilio Pérez Touriño, instou esta semana ao Concello de Lugo a cambiar de actitude. O municipio lugués acusou en xaneiro á Consellería de Cultura de "bombardear" o proxecto do auditorio. O departamento que dirixe Ánxela Bugallo emitiu un informe negativo xa que estimaba que as obras no cuartel de San Fernando podían afectar á muralla.

Hai escasos días coñecíase un informe de Icomos-España. Esta asociación que colabora coa Unesco, dáballe a razón a Cultura, e deixaba moi claro que a construción dun auditorio na zona elixida era incompatíbel coa protección da muralla. Icomos incluso sinalaba que, de levarse adiante as obras, corría risco a catalogación da muralla como Patrimonio da Humanidade.