Vieiros

O presidente da Xunta, Emilio Pérez Touriño, lamentou este venres que a Unión Europea "pechase a porta definitivamente" á construción civil nos terreos ociosos de Navantia-Fene. Neste sentido, engadiu que era o momento "de promover alternativas de desenvolvemento" para a comarca de Ferrolterra. Porén, o coordinador da Executiva do BNG e senador, Francisco Jorquera, asegurou que o BNG "non dá a batalla por perdida", e que vai realizar o máximo esforzo para tentar modificar a posición que o Executivo central mantén sobre este tema. "Cómpre un grande respaldo social", apuntou.

"Fíxose todo o que se podía facer"
Na conferencia de prensa posterior a súa xuntanza co presidente da Generalitat de Cataluña, José Montilla, Touriño fixo unha análise en clave negativa sobre a situación. O titular do goberno dixo que se "fixo todo o posíbel, todo o que se podía facer" para lograr o permiso de Bruxelas, para ofertas como a presentada por Hijos de J. Barreras. Ademais, admitiu que o resultado da reunión entre o director xeral de Competencia comunitario, Philip Lowe, e o conselleiro de Industria, Fernando Blanco, "non é unha boa noticia".

No entanto, o mandatario precisou que o seu Gabinete aínda deberá "analizar con calma" a "transmisión" na que Bruxelas "certifica" a súa oposición aos obxectivos da Xunta. Mais admitiu que, a partir das declaracións do director xeral, "enténdese que non hai posibilidades de facer viábel a proposta" para construír buques civís na superficie ociosa de Navantia.

"Dar batalla"
Pola súa banda, o coordinador da Executiva do BNG, Francisco Jorquera, anunciou, tamén este venres, que a formación nacionalista "dará a batalla" para conseguir que o goberno do Estado e a UE aproben o plan da Xunta para a construción naval civil en Navantia-Fene. Ademais, precisou que apoiarán mobilizacións sociais que teñan como finalidade estas reclamacións.

"Hai cada vez máis xente que non entende que haxa 600.000 metros cadrados que estean absolutamente desaproveitados, nin que o estaleiro Barreras teña que ir a Asia a montar proxectos empresariais", subliñou. Por iso, lamentou que o "consenso social" e o "consenso político" acadado por PPdeG, PSdeG e BNG en Galiza non fose avalado en Madrid.

Neste sentido, censurou a actitude dos deputados galegos do PSOE no Congreso dos Deputados, que votaron en contra do plan da Xunta. "Cada un que saque as súas propias conclusións das contradicións que teñen os socialistas aquí e en Madrid", agregou, ao tempo que manifestou que se todos os deputados ou senadores galegos votasen "a favor" de Galiza, "moitas cousas cambiarían" no país.