Vieiros

Os candidatos á mellor longametraxe son De bares, de Mario Iglesias, o filme de animación de Miguel Anxo Prado, De profundis, Mia Sarah, que, xunto coa anterior, estivo no Instituto Cervantes en Berlín, e Un franco, 14 pesetas. As curtas afortunadas foron Bechos raros, Bos días, Cicatrices e S.O.S.. Tamén está a categoría de curtas de animación, coas candidatas A bruxa Catuxa, A Promesa, O ladrón de bonecas e O globo animado. En canto aos filmes televisivos, A biblioteca da iguana, A Atlántida, Omar Martínez e O partido son as candidatas.

Seguindo coa televisión, os catro programas que optan ao premio son o primeiro "reality" galego, A casa de 1906, o programa musical Alalá, e os programas de cinema Onda Curta e Planeta Cine. en canto ás series, 25 anos de autonomía, A vida por diante, Libro de familia e Pepe o inglés compiten polo premio. Os que poden ser o mellor documental do 2006 son 2050, A dedo, historias de autostopistas, Labregos do mar, Linatakalam e Lume e fume.

Os artistas
Entre moitas outras candidaturas, destacan as de mellor banda sonora (ás que optan Mario de Benito por Un franco, 14 pesetas, o grupo integrado por Milladoiro, Pablo Milanés e Miguel Núñez, encargado de pórlle son a Sempre Habana, Nani García por acompañar a beleza das imaxes de De profundis coa súa música, Piti Sanz pola divertida banda sonora de Pepe o Inglés, e Sergio Moure e Stephen Warbeck por Cargo.

Hai filmes que repiten varias candidaturas, como á mellor dirección: de novo Un franco, 14 pesetas (de Carlos Iglesias), De bares, de Mario Iglesias, e De profundis, de Miguel Anxo Prado. Tamén é candidata Sonia Barros, directora da serie A casa de 1906.

E imos coas "estrelas" da noite: as persoas que lle poñen rostro ás artes audiovisuais. Como mellores comunicadores televisivos, son candidatos Manolo Romón, que nos convida a coñecer a literatura máis actual en Libro aberto, Paco Lodeiro, que conduce todos os días na sobremesa o concurso Cifras e letras, Pilar García Rego, que nos leva da súa man a través da música tradicional en Alalá, e Mayte Cabezas Amigo, por A revista de fin de semana.

Os actores e actrices que poden ser premiados son os protagonistas de Un franco, 14 pesetas Carlos Iglesias, Isabel Blanco e Nieve de Medina. Tamén Daniel Brühl e Luís Tosar, por Cargo, Evaristo Calvo, por A biblioteca da iguana, e as protagonistas da serie A vida por diante, Belén Constenla e Mela Casal.

A lista completa pódese consultar na web da Academia Galega.