Vieiros

Israel non colaborará co novo goberno da Autoridade Nacional Palestina mentres non cumpra as condicións do Cuarteto de Madrid. Así o asegurou este domingo o primeiro ministro israelí, Ehud Olmert que anunciou tamén que a súa postura é "inamovíbel". Os requisitos esixidos polo cuarteto formado polos EUA, Rusia, UE e a ONU ao anterior goberno palestino do islamita Haniye son recoñecer o Estado de Israel, o fin da violencia e a aceptación dos acordos de paz. Segundo o diario Haáretz, a decisión do mandatario israelí foi tomada o pasado venres logo de consultala co presidente dos Estados Unidos, George Bush. O anuncio faise a só 24 horas de que comece un cumio a tres bandas entre a secretaria de Estado dos EUA, Condoleezza Rice, o presidente palestino, Mahmud Abás, e Olmert.