Vieiros

Aínda que este trámite non comporta a autorización inmediata destas piscifatorías, pois aínda quedan os informes de viabilidade preceitivos que deben emitir os distintos órganos, incluído o ambiental, ADEGA entende que a declaración de hoxe ven a distorsionar todo o procedemento de revisión do Plano Sectorial e podería supoñer un trato de favor cara Stolt fronte ás demáis empresas do sector e sobre todo os colectivos locais (veciños/as, mariscadores/as...)

Cómpre lembrar que ADEGA ten presentado alegacións ao documento de inicio da revisión do Plano Sectorial, que fan referenza ás afeccións sobre espazos de alto valor paisaxístico e ecolóxico, así como aos posíbeis impactos sobre o patrimonio histórico e etnográfico. Na nosa exposición referiámonos ás cautelas precisas para salvagardar estes valiosos elementos patrimoniais, propoñendo causas de exclusión e distancias mínimas para o amortecemento dos impactos. Parece evidente que nos casos de Quilmas (Carnota) e Baroña (Porto do Son) vanse producir máis que probábeis afeccións aos LICs próximos (en Quilmas, os LIC Carnota-Monte Pindo e Costa da Morte) ou ao emblemático Castro de Baroña.

Por outra banda, ADEGA quere lembrar ao governo da Xunta que os proxectos de Stolt para Quilmas e Baroña, dos que a día de hoxe descoñecemos os seus detalles, teñen suscitado un forte rexeitamento por parte da poboación local, dada a actitude de prepotencia e chantaxe dos responsábeis de Stolt.

Unha administración non debería tolerar actitudes intimidatorias por parte de ningunha empresa e menos aínda premiala coa declaración de supramunicipalidade, á marxe de calquera planificación estratéxica. Qué sentido ten entón modificar o Plano Sectorial de Acuicultura do PP se se logo se acaban aplicando as mesmas políticas insustentábeis e arbitrarias?