Vieiros

Na súa comparecencia ante os medios de comunicación, Pérez Touriño explicou que este xoves o Consello da Xunta aprobará a participación do Goberno nesta nova empresa. O Executivo achegará o 29% do seu capital social a través de Xesgalicia, co Fondo Emprende. Ademais, contará con outra participación por medio do Igape.

A empresa T-Solar Global contará cun investimento de entre 75 e 80 millóns de euros, segundo afirmou Marcial Portela, e entrará en servizo "en poucos meses", cara finais do 2008. "A partir do segundo semestre do ano que vén as células fotovoltaicas estarán xa no mercado", dixo.

Paneis solares máis rendíbeis
Portela explicou que na planta "desenvolverán unha tecnoloxía punta de fabricación de paneis solares fotovoltaicos", que solucionará "algún dos problemas que teñen as tecnoloxías de fabricación de paneis de silicio cristalino", posto que os paneis de T-Solar Global empregan menos cantidade de silicio para producir a mesma cantidade de enerxía; e porque se precisa menos enerxía no propio proceso para fabricalos.

Segundo remarcou na súa intervención, "se logramos avanzar con rapidez" nesta nova tecnoloxía, o proxecto presentado hoxe (polo martes) converterase na "primeira fábrica de tamaño industrial grande que empece a producir paneis de lámina delgada en Europa".

Posíbel fabrica de biodiésel
Por outra banda, o representante do grupo promotor do proxecto T-Solar Global anunciou a posibilidade de desenvolver, tamén en Galiza, unha importante planta de fabricación de biodiésel. Ao seu xuízo, de se levar a cabo "esta nova empresa galega podería estar dentro da lista das dez primeiras do país no espazo de tres ou catro anos". O proxecto requiriría investimentos "da orde de 300 millóns de euros", sinalou, malia que estarían repartidos entre a hipotética fábrica galega e outra, previsibelmente, na zona do Mediterráneo, matizou.