Vieiros

Con imaxes e palabras, o libro quere concienciar á poboación galega da necesidade de non esquecer un fenómeno natural que sempre afecta de modo máis grave ás persoas máis desprotexidas: facernos reflexionar sobre a desigualdade no mundo a todos os niveis (a emigración, os fenómenos naturais, a guerra, a enfermidade). O deuvedé acolle contidos máis vencellados á tsunami, como un audiovisual do traballo de Implicadas na zona afectada da India, unha animación que presenta de forma amena a cooperación internacional, outros proxectos na India e Etiopía e un xogo interactivo.

O son das buguinas é tamén o título da exposición promovida por IND que busca invitar a reflexionar sobre a necesidade dun compromiso permanente na resolución da pobreza para evitar e previr desastres como a tsunami. Deste xeito, as fotos de Paco Vila, as ilustracións de Xulia Barros e os textos de María Reimóndez serven para articular un repaso ao antes, ao durante e ao incerto despois co que terán que enfrontarse os milleiros de persoas que padeceron de xeito máis directo as consecuencias da tsunami.