Vieiros

Os ministros de Economía e Agricultura presiden este luns a sinatura do Protocolo de Entendemento entre a Associaçao Portuguesa para o Investimento (API) e a multinacional galega. Este será o primeiro paso concreto para a construción da maior piscifactoría de rodaballo do mundo. Os terreos nos que se fixou Pescanova están no municipio de Mira, que pertence ao distrito de Coimbra.

Pescanova quere producir 7.000 toneladas de rodaballo ao ano e promete, a medio prazo, a creación de 350 postos laborais. O investimentos, segundo algunhas fontes, andará á beira dos 140 millóns de euros. De feito, diversos sectores laiaron estas últimas semanas a "oportunidade perdida" para a economía galega, sen faceren apenas referenzas ao impacto ambiental do proxecto.

En declaracións á axencia de noticias Lusa, Helder Spínola asegurou que a produción de peixe en cativerio tamén leva canda si importantes problemas ecolóxicos, en especial se se fai de forma intensiva, debido a que se libera auga con elevadas cantidades de materia orgánica e antibióticos. Ademais resalta que a fábrica vai quedar a escasa distancia da praia, o que implica a destrución de máis de cen hectáreas de terreos con floresta ou vexetación dunar. Dende Quercus avogan por un estudo rigoroso de impacto ambiental e por posteriores localizacións alternativas.